by Det er nokre veker sidan sesongen var ferdigspelt, det er tre veker sidan årsfesten til seniorfotballen – og det er ei og ei halv veke sidan det årlege møtet til fotballgruppa. Men sjølv om vi no snart nærmar oss ei ny oppkøyring, så er vi ikkje heilt ferdige med å oppsummere 2022-sesongen heilt enno.
Fredag la vi ut ei oppdatering frå den administrative adelskalenderen på Hareid IL sin Facebook-profil. Og dei neste dagane kjem vi med litt statistikk frå årsmeldingane til nokre av laga våre.
Vi startar med damelaget. Det var Andrea Holstad Grimstad (biletet) som fekk toppscorar-pokalen der i år, og som det vart forklart på årsfesten var dette inkludert både seriekampar og andre kampar.
Ser vi derimot berre på seriekampane, som står oppført i årsmeldinga, så var det Helene Sjåstad Kleppe som scora flest med 10 mål på 11 kampar. Andrea Holstad Grimstad scora 8 seriemål. Andre målfarlege spelarar var Victoria Røren (7) og Trude Håkonsholm Lunaas (6).
Damelaget spelte 12 seriekampar i år. Andrea Holstad Grimstad og Ragna Riise Grimstad var dei einaste som spelte alle. Arnhild Åsmo Bigset, Helene Sjåstad Kleppe, Oline Røyset og Sarah Garnes spelte alle 11 kampar. Totalt nytta laget heile 28 spelarar i serien. Av desse var fire i J15-alder.
