by I dei åtte sesongane mellom 2005 og 2012 var det alltid anten Even Hansrud, Ronny Jørgensen eller Kim-Tore Husøy som vart toppscorar for Hareid sitt a-lag for menn, og før det igjen var Remi Helleseth toppscorar i tre sesongar (02-04) og Bjørge Worren dei tre åra før det (99-01).
Frå 2013 av har Hareid derimot fått ny toppscorar kvar einaste sesong:
2013: Christer Adrian Mork. 2014: Ola Kalvø Vattøy. 2015: Georg Eikrem Olsen. 2016: Delt mellom Runar Stranden og Thor-Ove Brekke. 2017: Martinus Røyset Bakken. 2018: August J. Brandal. 2019: Ruben Kenneth Brandal. 2021: Petter Haddal Worren.
Og denne sesongen vart det endå ein ny toppscorar.
James Kenneth Sjåstad vart nemleg Hareids mestscorande med 12 mål. Totalt inkludert treningskampar scora han 18. Når Hareid sin toppscorarpokal skal delast ut er det derimot serie- og cup-mål som tel (med mindre det er likt). Mål i treningskampar og turneringar tel derimot på adelskalenderen. (Dette forklarer kvifor Georg Eikrem Olsen ikkje vart Hareid sin offisielle toppscorar i 2011, sjølv om han scora elleville 32 mål totalt. Kim-Tore Husøy hadde fleire i serien.)
Nærast Sjåstad på målstatistikken i år var fjorårets toppscorar Petter Haddal Worren, som scora ni mål – alle i serien. (Det var forresten også Worren som var nærast Sjåstad på assist-toppen.)
Vidare scora Kristoffer Stranden sju mål (fem i serien) og Ørjan Engen Grimstad fire (to i serien).
Flest kampar i år hadde kaptein Gustav Bjørlykke Kløvning og James Kenneth Sjåstad, med 28 kvar. Nerijus Marcinkevcius hadde 27, Ørjan Engen Grimstad og Petter Haddal Worren 24, Oliver Sulebakk Sylte 23 og Erlend Skeide 20. Så vidt vi veit er ikkje adelskalenderen oppdatert enno, men vi reknar med den blir det etter kvart. Vi kjem tilbake med info då om nokon har passert 100, 200 kampar osv.
A-laget har uansett ein fyldig statistikkdel i si årsmelding. Det blir ikkje lista opp kor mange treningar den enkelte har vore på, men Gustav Bjørlykke Kløvning, James Kenneth Sjåstad, Oliver Sulebakk Sylte og Håvard Knudsen Bjåstad hadde flest – i den rekkefølgja.
Karane er no forresten inne i ein roleg periode med opplading til Grendacupen. Oppkøyringa til ny sesong startar like etter nyttår. Ein satsar på at eit nytt trenarteam er presentert i god tid før det.
