På grunn av litt seint fullført årsrekneskap vil årets årsmøte bli avholdt onsdag 26. mars kl 18. Beklagar forsinkinga. Saklista vert den same som vist under.

Det vert med dette kalla inn til årsmøte i Hareid Idrettslag 12. mars 2025 kl 18.00 i festsalen på klubbhuset, Myravegen 12.

Sakliste:

 1. Godkjenne dei som har røysterett

2. Velje dirigent(ar)

3. Velje protokollførar(ar)

4. Velje to medlemmer til å underskrive protokollen

5. Godkjenne innkallinga

6. Godkjenne saklista

7. Godkjenne forretningsordenen

8. Handsame årsmeldinga frå idrettslaget

9. Handsame rekneskapen til idrettslaget, den økonomiske meldinga frå styret, meldinga frå kontrollutvalet og meldinga frå revisor

10. Handsame forslag og saker

11. Fastsette medlemskontingent og treningsavgift

12. Vedta budsjettet til idrettslaget

13. Handsame organisasjonsplanen til idrettslaget, herunder opprette ny volleyballgruppe og sjå på organisering av badmintongruppe

14. Endre signatur for hovudstyret

14. Gjere følgjande val:

a) styre med leiar, nestleiar, 3-6 styremedlemmer og 2 varamedlemmer

b) kontrollutval med 2 medlemmer og minst 1 varamedlem

c) representantar til ting og møte i dei organisasjonsledda der idrettslaget har representasjonsrett, eller gje styret fullmakt til å nemne opp representantane

d) valkomité med leiar, to medlemmer og éin varamedlem

e) eventuelt andre val i samsvar med organisasjonsplanen til idrettslaget

Leiarar og nestleiarar skal veljast enkeltvis. Dei andre medlemmene skal veljast samla. Deretter skal varamedlemmene veljast samla. Der det blir valt fleire varamedlemmer, skal det veljast 1. varamedlem, 2. varamedlem osv.

15. Engasjere revisor til å revidere rekneskapen til idrettslaget.

Saker som ein ynskjer handsama må vere styret i hende  innan 25. februar 2024.

Årsmøtedokumenta vert gjort tilgjengelege på hareidil.no seinast 5. mars 2024.

Hareid IL

Hovudstyret

Hareid IL Fotball har motteke 500 000 kr i støtte frå Sparebankstiftinga Søre Sunnmøre. Midlane har gått til å fullføre tribuneprosjektet vårt, som no står klart til bruk. Støtta har vore viktig for å få realisert dette prosjektet, og vi takkar Sparebankstiftinga for deira engasjement og for å gjere det mogleg for oss å realisere denne draumen. Vi ser fram til å dele mange flotte stunder på den nye tribuna saman med dykk alle. Tusen takk for støtta!

(Framhald frå artikkelen frå 22. desember)

Dameklassen:

Med ei god blanding av spelarar med fortid eller notid i Hødd og/eller Molde skal det truleg bli vanskeleg å vippe «Trines Disipler» av pinnen.

Vi merkar oss at dei har Martha Helvig Omdal i stallen i år.

Vinn ho i år også tek ho sitt åttande Grendacup-gull – og går i tilfelle forbi André Egset Nupen på den statistikken (sjølvsagt gitt at Nupen ikkje vinn i år, men det kan vi så godt som garantere at han ikkje gjer).

«Holemix» blir truleg nærast utfordrar, medan «Akkurat i siste liten» og «Oppsopet» kanskje kan hevde seg i enkeltkampar.

Dei tre unge laga i dameklassen har vi mindre oversikt over, men vi ser ikkje vekk frå at eitt av dei kan kan overraske – og om dei har vore heldige med trekninga (noko vi ikkje har vurdert her) kan snuse på ein finaleplass.

Ungdom gutar:

Når det gjeld ungdomsklassen hevdar ekspertise vi har snakka med at heile seks av dei sju laga kan kome til finalen. Ingen er spesielt større favorittar enn andre.

Det var heller ikkje seeding i ungdomsklassen, så her kan vi ikkje sjå vekk frå at trekninga har hatt ein del å seie.

For dei hundreinteresserte hadde det sikkert gjort seg med ein finale mellom Bisja mi 1 og Bisja mi 2, men hundar brukar ikkje å like seg så godt i desse rakett-tider, så om vi skal tippe stoppar desse laga i semifinalen.

Så om vi skal tippe vilt, noko som jo er mandatet her, går vi for gull til «Arnolds dispiler», som i motsetning til ein del av dei andre laga har meldt på ein brei tropp.

Biletet over: Martha Helvig Omdal (nummer to frå venstre med etterkomar på fanget) då ho vann Grendacupen for sjuande gong i 2015. Kan ho ta sin åttande tittel åtte år etter?)

Søndag føremiddag samla fem karar seg fysisk og digitalt for å gjennomføre trekninga til Møremegling Grendacupen 2023.

Som tradisjonen tilseier skal semifinalistane frå herreklassen i fjor seedast. Sidan det er fem grupper i år måtte også eit lag til veljast ut basert på forventa kvalitet.

Her var det ikkje lett å velje ut eitt lag, men basert på at Markus Hareide nettopp har fornya årskortet sitt i klivrehallen – og at Bastian Rasmussen har lada opp med mykje blytung hiphop på stereoanlegget siste tida – så landa dei frammøtte på at «Kjekt de» fekk den siste seedingsplassen.

Alle dei innleiande gruppene ser ein her.

Sånn i farten ser vi inga «dødens gruppe».

Mange håpte nok på ein duell mellom «Forræder» og «Startgass», men det ser ut som Ruben Kenneth Brandal må vente til dag 2 for å finne fram dei største leggskinna han har i boda.

Gruppe E er kanskje det næraste vi kjem ei «dødens gruppe», men så ofte som hurtigbåten og ferja er innstilt for tida treng det ikkje om å vere ein fordel å ha med så mange SIF-spelarar som «SIF +» har.

I fjor var det forresten mellomspel i herreklassen. Tilbakemeldingane på det var så gode at arrangørane prøvde å få til noko liknande i år også.

Men sidan det var fleire påmelde lag enn i fjor fann ein ingen matematisk formel som gjorde eit slikt mellomspel fornuftig i år. Dermed går ein rett på 1/8-finalar dag 2.

Sidan det var så få påmelde jentelag valde arrangørane å slå saman dame- og jenteklassen (men det blir eigne prisar for jentene). Dei blir då sju lag, same som ungdomsklassen for gutar.

I dameklassen vart to lag seeda: Trines Disipler og Holemix.

Fire lag går vidare til semifinale dag 2.

Det same gjeld altså i ungdom gutar.

Her vart ingen lag seeda, men sidan «Bisja mi» melde på to lag, vart desse plasserte i kvar si gruppe.

***

Kampoppsettet finn ein no i sin heilskap her, og det er viktig at alle lagleiarane set seg inn i det i god tid før 28. desember, første kampdag.

(I grunnen er kampoppsettet ganske oversikteleg og greitt i år, sidan ingen grupper har fem lag. 12 minutt per kamp i grupper med fire lag, 15 minutt i grupper med tre lag. 15 minutt for sluttspelskampane dag 2, med unntak av finalane, som varer i 20 minutt.)

Arrangørane sender ikkje ut påminning dagen før. Når laget kjem til hallen må dei melde seg i sekretariatet for å hente «dommarkortet». Her fyller ein ut namna på spelarane på laget, og arket må leverast inn seinast 30 minutt før første kamp. (Det må i same renna også betalast.) Dersom alle 10 rutene er fylt ut kan ein ikkje melde på fleire spelarar i løpet av turneringa.

Skulle ein derimot ha ledige ruter kan ein kome med fleire spelarar undervegs i turneringa, men sjølvsagt berre dersom ein held seg innanfor regelverket med omsyn til utlendingar osv.

***

Når det gjeld hovudbiletet i denne saka, så er kanskje ikkje overskrifta så lett å lese. Men der står «Generajonsskifte».

Det var Vikebladet Vestposten som melde det etter at gjengen på biletet vann herreklassen i 2009, etter at laga til Espen Beiermann, Roy Inge Brandal, André Egset Nupen ++ hadde dominert i fleire år.

Gjengen på biletet vann igjen i 2010, men så dukka faktisk dei nemnde karane opp igjen og vann både i 2011 og 2013.

Året i mellom var det «Familieselskap», med Aursnes-karar fødde både på 70-, og 90-talet, som vann. (Og også i 2015 vann eit slags familielag: «RISK»)

Poenget med dette tilbakeblikket var å lufte spørsmålet om vi i åra som kjem får ei turnering dominert av fjorårssvinnarane «Hardbarka Alkisa FC», i år «Startgass».

Dei var svært gode i fjor, og ser ikkje på papiret spesielt svekka ut i år. Heller snarare tvert imot.

Men så kan det altså skje som sist det vart snakka om generasjonsskifte, at tidlegare vinnarar slår tilbake igjen.

Det kan til dømes vere «Karanja», omtrent same gjengen som vann i 2016 og 2019.

Mindre sannsynleg er det at 2006-vinnarane på «Holemix» går til topps igjen.

Vi har heller ikkje så stor tru på «Forræder», omtrent same gjengen som vann i 2014, all den tid Ruben Kenneth Brandal har hoppa av lasset for å prioritere den nye omgangskretsen sin.

Men det kan også bli endå yngre lag enn «Startgass» som slår til, anten i år eller seinare. Til dømes kan det vere «Hjøa» med mange spennande juniorar i stallen.

Apropos «Holemix» så er det utvilsamt på damesida dei har hevda seg best i nyare tid. Men sist siger kom tilbake i 2018.

Så det er kanskje på tide å tenke på å fylle opp pokalskapet igjen der. Eller blir «Trines disipler» rett og slett for gode?

Spørsmåla er mange. Svara før vi ikkje før 28. og 29. desember. Inntil vidare: god advent og god jul!